कार्तिक महिनासम्ममा बैंकहरुले कुल १३२ किलो सुन आयात गरेका थिए। भन्सार दर महँगो भएका कारण बैंकको सुन बिक्न छोडेपछि बैंकहरुले सुन आयात नै बन्द गरेका थिए।
तर सरकारले भन्सार दर २० प्रतिशतबाट घटाएर १० प्रतिशतमा झारेपछि सुन आयात पुन: सुरु गरेका हुन्। चालु आर्थिक वर्षको मंसिरसम्ममा बैंकहरुले कुल १ सय ८५ किलो सुन आयात गरिसकेका छन्। मंसिरसम्ममा बैंकहरुले कुल २ अर्ब ४ करोड रुपैयाँको सुन आयात गरेका हुन्।
भन्सार दर घटे पछि सुनको भाउ निकै घटेको छ। भन्सार दर घटेकै कारण करिब १५ हजार रुपैयाँ घटेको सुनको भाउ अन्तराष्ट्रिय बजारमा देखिएको गिरावटले थप घटिरहेको छ। अहिले सुनको भाउ प्रतितोला १ लाख ५० हजार रुपैयाँ भन्दा तल झरेको छ।
गत वर्षको तुलनामा यस वर्ष बैंकहरुले आयात गरेको सुन निकै कम छ। गत वर्षको यसै अवधिमा बैंकहरुले एक हजार किलो भन्दा धेरै सुन आयात गरिसकेका थिए। तर चालु आर्थिक वर्षमा २०० किलो पनि आयात गरेका छैनन्।
