संसदको प्रमुख विपक्षी दल, कांग्रेस आईकी महासचिव प्रियन्का गान्धीले एउटा सामान्य ब्याग बोकेर संसद बैठकमा भाग लिन गईन । तर, त्यही घटना असमान्य बन्यो र राजनीतिक रंग लियो ।
गान्धीले बोकेको ह्याण्ड ब्यागमा प्यालेष्टाइन लेखिएको थियो । बस् के थियो ? सत्तारुढ विजेपीले उनीमाथि आरोप लगायो-कांग्रेसले प्यालेष्टानीको पक्षमा संसदमा आवाज उठाउने तयारी गर्यो ।
भाजपा प्रवक्ता संवित पात्राले त कांग्रेसले प्यालेष्टेनी आतंकवादीको पक्षमा लागेर भारत र इजरायलबीचको सम्वन्धमा दरार उत्पन्न गराउन खोजेको आरोप नै लगाएका छन् । गान्धीको ब्यागको कारण उत्पन्न विवादले भारतीय राजनीति केही समय तात्न सक्ने देखिएको छ ।
स्मरणीय के छ भने इजरायल प्यालेष्टाइन द्धन्दमा सत्तारुढ भाजपा इजरायल सरकारको पक्षमा रहँदै आएको छ भने कांग्रेसले प्यालेष्टाइनीहरुप्रति ऐक्यवद्धता जनाएको छ । केही दिन अघि महासचिव प्रियन्का गान्धीले भारतका लागि प्यालेष्टानी राजदूत अबेद एलरागेजसँग भेटेर इजरायली आक्रमणको विरोध गरेकी थिइन । केही महिना अगाडि नै उनले इजरायली प्रधानमन्त्री बेन्जामिन नेतान्याहुलाई नरसंहारकारी भन्दै प्यालेष्टाइनी जनताको हत्याको मूल्य चुकाउनु पर्ने चेतावनी दिएकी थिइन ।
